Bernardu Silvaning «Real Madrid»ga oʻtish tafsilotlari maʼlum boʻldi
Yarimhimoyachi Bernardu Silva Madridning «Real» klubiga oʻtadi, deya xabar bermoqda Transfer News Live insayder Fabrisio Romanoga tayanib. 31 yoshli portugaliyalik futbolchi «Manchester Siti»ni erkin agent sifatida tark etadi va «Qirollik klubi» bilan uch yillik shartnoma imzolaydi.
Manbaga koʻra, futbolchining «Real»dagi maoshi yiliga 20 million yevroni tashkil qiladi. Shuningdek, oʻyinchi 10 million yevro miqdorida shartnoma imzolagani uchun bonus (koʻtarma puli) oladi, uning agenti Jorje Mendes va otasiga esa yana 10 million yevro komissiya puli toʻlanadi.
Yakunlangan mavsumda yarimhimoyachi «Manchester Siti» safida barcha turnirlarda 53 ta oʻyin oʻtkazib, 3 ta gol urdi va 5 ta golli uzatmani amalga oshirdi. U 2017-yildan buyon ingliz klubidagi faoliyati davomida 19 ta sovrin, jumladan, 6 ta APL chempionligi va Chempionlar Ligasini qoʻlga kiritgan.