Bernardu Silva faoliyatini «Barselona»da davom ettirmoqchi, biroq kataloniyaliklarning rejalari boshqacha
«Manchester Siti» bilan amaldagi shartnomasi joriy yozda o‘z nihoyasiga yetadigan yarimhimoyachi Bernardu Silva «Barselona»ga o‘tishni o‘zi uchun ustuvor vazifa qilib belgiladi. Futbolchining nomzodi agent Jorje Mendesh orqali «ko‘k-anorranglilar»ga taklif qilingan. Bu haqda Sport.es nashri xabar bermoqda.
Manbaning ma’lum qilishicha, Kataloniya klubi rahbariyati Bernardu bilan shartnoma imzolanishini «qiziqarli kelishuv» deb hisoblamoqda, biroq ayni damda jamoaning ushbu pozitsiyasida futbolchilar soni haddan tashqari ko‘p ekanligini ham tushunib turibdi. Shu sababli, «Barselona» «Manchester Siti» sardorini safiga qo‘shib olish masalasiga unchalik e’tibor qaratmayapti. Chunki «blaugrana» yozgi transferlar oynasida, eng avvalo, markaziy himoyachi va hujumchi sotib olishni maqsad qilgan. Shunday bo‘lsa-da, klub mutasaddilari 31 yoshli yarimhimoyachining yuqori mahoratiga shubha qilishmayapti.
Ma’lumot o‘rnida, Bernardu Silva joriy mavsumda barcha turnirlar doirasida 41 ta uchrashuvda maydonga tushib, o‘z hisobiga 3 ta gol va 5 ta samarali uzatmani yozdirib qo‘ydi. Transfermarkt portali tomonidan taqdim etilgan ma’lumotlarga ko‘ra, tajribali futbolchining ayni damdagi bozor qiymati 27 million yevroni tashkil etmoqda.
