Benzema «Lion»ga futbolchi sifatida qaytmaydi — manba
«Al Hilol» hujumchisi Karim Benzema ijtimoiy tarmoqdagi jonli efir vaqtida «Lion» klubiga futbolchi sifatida qaytish niyati yo‘qligini ma’lum qildi.
38 yoshli fransiyalik hujumchining so‘zlariga ko‘ra, u o‘zi tarbiyalangan jamoada qayta to‘p surishiga shubha qilmoqda. Biroq Benzema futbolchilik faoliyatini yakunlaganidan so‘ng klub rahbariyatiga qo‘shilish ehtimolini istisno qilmadi.
Benzema 2005 yildan 2009 yilga qadar «Lion»ning asosiy tarkibida harakat qilgan va shundan so‘ng «Real»ga o‘tgan edi. U Fransiya klubi safida barcha turnirlar doirasida 148 ta o‘yinda maydonga tushib, 66 ta gol va 25 ta golli uzatmani o‘z hisobiga yozdirib qo‘ygan.
Eslatib o‘tamiz, Benzema shu yilning fevral oyida «Al Ittihod»dan «Al Hilol» jamoasiga ko‘chib o‘tgan edi.
