«Benfika» Vinisius bilan bog‘liq mojaroga munosabat bildirdi: «Real» futbolchilari buni eshitishlari imkonsiz edi»
Portugaliyaning «Benfika» klubi Chempionlar Ligasi pley-off bosqichi doirasidagi «Real» bilan o‘yinda yuz bergan Vinisius Junior va Janluka Prestianni ishtirokidagi voqea yuzasidan ijtimoiy tarmoqlarda rasmiy bayonot berdi.
«Burgutlar» matbuot xizmati Vinisius irqchilik haqida shikoyat qilish uchun hakam Fransua Leteksyega murojaat qilgan lahzaning videosini e’lon qildi.
«Kadrlardan ko‘rinib turibdiki, oraliq masofani hisobga olsak, «Real» futbolchilari o‘zlari eshitganini da’vo qilayotgan gaplarni eshitishlari imkonsiz edi», — deyiladi «Benfika» xabarida.
Eslatib o‘tamiz, o‘yinning ikkinchi bo‘limida braziliyalik hujumchi «Benfika» a’zosi uni «maymun» deb haqoratlaganini aytganidan so‘ng bahs to‘xtatilgan edi. Hozirda UEFA mazkur holat yuzasidan intizomiy surishtiruv ishlarini olib bormoqda.
