\"Bavariya\" yozgi transfer oynasini yakunlaganini ma’lum qildi
"Myunxenning "Bavariya" klubi yozgi transfer oynasining qolgan qismida yangi futbolchilarni xarid qilishni rejalashtirmayotganini rasman ma’lum qildi.
Klubning sport bo‘yicha boshqaruv a’zosi Maks Eberlning ta’kidlashicha, jamoa tarkibi shakllantirib bo‘lingan va hozirgi tarkib murabbiylar shtabini to‘liq qoniqtirmoqda. Uning so‘zlariga ko‘ra, transfer bozorida favqulodda vaziyat yuzaga kelmasa, yangi futbolchilar olib kelinmaydi.
"Bavariya" ushbu transfer oynasida bir qator muhim transferlarni amalga oshirdi va endi asosiy e’tiborini yangi mavsumga tayyorgarlikka qaratgan. Klub rahbariyati mavjud futbolchilar bilan barcha musobaqalarda yuqori natijalarga erishish mumkinligiga ishonmoqda.
Shu tariqa, "Bavariya" transfer oynasi yopilguniga qadar yana yangi futbolchilarni xarid qilishi haqidagi mish-mishlarga amalda nuqta qo‘ydi.
