«Bavariya» «Real Madrid»ning XXI asrdagi afsonaviy rekordini yangiladi
Germaniya Bundesligasining yakuniy, 34-turida Myunxenning «Bavariya» klubi «Kyoln» ustidan yirik – 5:1 hisobida gʻalaba qozondi. Ushbu uchrashuvdagi gollar myunxenliklar uchun shunchaki navbatdagi gʻalabani emas, balki Yevropa futboli tarixidagi yangi rekordni taʼminladi.
Squawka tahliliy sahifasining xabar berishicha, «Bavariya» joriy mavsumda Germaniya chempionatidagi gollari sonini 122 taga yetkazdi. Bu bilan jamoa XXI asrda Yevropaning kuchli beshlik (top) ligalarida bir mavsumda eng koʻp gol urish borasida Madridning «Real» klubiga tegishli boʻlgan rekordni yangiladi.
Avvalgi rekord 2011/2012 yilgi mavsumda qayd etilgan boʻlib, oʻshanda Joze Mourinyu qoʻl ostidagi «qirollik klubi» Ispaniya La Ligasida 121 ta gol urishga muvaffaq boʻlgandi.
34 tur yakunlariga koʻra, «Bavariya» 89 ochko jamgʻargan holda eng yaqin taʼqibchilaridan katta farq bilan chempionlikni qoʻlga kiritdi. Turnir jadvalining kuchli uchligi quyidagicha koʻrinish oldi:
- «Bavariya» — 89 ochko
- «Borussiya Dortmund» — 73 ochko
- «RB Leypsig» — 65 ochko
