«Bavariya» Noyerga o‘rinbosar izlamoqda

Myunxenning «Bavariya» klubi mavsum yakunida Manuel Noyerning ehtimoliy ketishi munosabati bilan yangi darvozabon izlash ishlarini faol olib bormoqda.

Jurnalist Ekrem Konur xabar berishicha, myunxenliklar hozirda to‘rt nafar darvozabon nomzodini ko‘rib chiqmoqda. Ular — «Atletiko»dan Xuan Musso, «Xoffenxaym»dan Oliver Baumann, «Fulhem»dan Bernd Leno va «Nyukasl»dan Nik Poupe.

40 yoshli Noyer uchun joriy mavsum katta ehtimol bilan faoliyatidagi so‘nggisi bo‘ladi. Darvozabon bu mavsumda barcha musobaqalar doirasida 5 ta uchrashuvda ishtirok etib, 2 ta gol o‘tkazib yuborgan va 3 marta o‘z darvozasi daxlsizligini saqlab qolgan.

Bundesliganing 4 turidan so‘ng «Bavariya» 10 ochko bilan musobaqa jadvalida 2-o‘rinni egallab turibdi.

Roziqjon Sultonmurodov

Jurnalist

0 0 1 0 0 0