«Bavariya» Noyer bilan shartnomani 2027 yilgacha uzaytirmoqchi - manba
Myunxenning «Bavariya» klubi darvozabon Manuel Noyer bilan yangi shartnoma imzolashga qaror qildi. Bu haqda Bild nashri xabar bermoqda.
Yangi kelishuvga ko‘ra, 2014 yilgi jahon chempioni klub safida 2027 yil yozigacha harakat qiladi. Shu vaqtga kelib Noyer 41 yoshga to‘ladi.
Manba ma’lumotiga ko‘ra, nemis darvozaboni bilan muzokaralar dekabr oyida boshlanadi. Klub rahbariyati Noyerning so‘nggi paytlardagi o‘yini va jarohatlarning oldini olish uchun kundalik tartibiga kiritgan o‘zgarishlaridan mamnun.
Ma’lum qilinishicha, Noyer har kuni jamoa fizioterapevti bilan maslahatlashib, asosiy mashg‘ulotlar oldidan va keyin qo‘shimcha mashqlar bajaradi.
Joriy mavsumda Noyer «Bavariya» safida barcha musobaqalarda 13 ta o‘yin o‘tkazib, ularning 6 tasida darvozasini daxlsiz saqlab qolgan.
