«Bavariya» Jekson bo‘yicha bir qarorga keldi
“Bavariya” klubi “Chelsi” forvardi Nikolas Jeksonni sotib olmasligi mumkin. Bu haqda Abendzeitung nashri xabar berdi.
Manbaga ko‘ra, tomonlar o‘rtasida tuzilgan shartnomada sotib olish majburiyati bor edi.
Myunxenliklar hujumchini Bundesliga va Chempionlar Ligasida 40 ta o‘yinda kamida 45 daqiqa maydonda bo‘lsa, 65 million yevroga sotib olishlari shart edi. Ammo senegallik futbolchi bu shartni endi hatto nazariy jihatdan ham bajara olmaydi.
Germaniya grandi hali ham o‘z xohishiga ko‘ra Nikolas Jekson transferini amalga oshirishi mumkin, biroq klub ma’muriyati buni rejalashtirmayotganini ma’lum qildi. 24 yoshli futbolchi Vensan Kompani jamoasi tarkibida barcha musobaqalarda 14 ta o‘yinda ishtirok etib, 4 ta gol urdi va bitta gol uzatmasini amalga oshirdi.
