“Bavariya” Dani Olmoni o'z safiga qo'shib olmoqchi
Myunxenning “Bavariya” klubi “Barselona” yarim himoyachisi Dani Olmoni o‘z safiga qo‘shib olishga jiddiy qiziqish bildirmoqda. Germaniya grandi 28 yoshli ispaniyalik futbolchi bo‘yicha transfer imkoniyatlarini o‘rganmoqda. Bu haqda jurnalist Ekrem Konur ijtimoiy tarmoqlardagi sahifasida ma’lum qildi.
Manbaga ko‘ra, “Barselona” Dani Olmoni 80–90 million yevro atrofida baholamoqda. “Bavariya” futbolchi uchun asosiy da’vogarlardan biri bo‘lsa-da, unga Angliyaning “Manchester Yunayted”, “Manchester Siti”, “Arsenal”, “Chelsi” va “Tottenhem” klublari, shuningdek Saudiya Arabistonining “Al-Hilol” jamoasi ham qiziqish bildirmoqda.
Olmo “Barselona”ning muhim futbolchilaridan biri bo‘lib qolmoqda, shu sababli kataloniyaliklar uni arzon narxda qo‘yib yuborishni rejalashtirmayapti. Futbolchiga bo‘lgan katta qiziqish sabab uning kelajagi navbatdagi transfer oynasi oldidan asosiy muhokama mavzularidan biriga aylanishi mumkin.
Ma’lumot uchun, Dani Olmoning “Barselona” bilan amaldagi shartnomasi 2030-yilning 30-iyuniga qadar mo‘ljallangan. Transfermarkt 28 yoshli Ispaniya terma jamoasi yarim himoyachisining bozor qiymatini 60 million yevroga baholamoqda.
