«Bavariya» Alfonso Devisning jarohati borasida rasmiy ma’lumot berdi
Myunxenning «Bavariya» klubi ijtimoiy tarmoqlardagi sahifalarida jamoaning chap qanot himoyachisi Alfonso Devisning ayni damdagi holati yuzasidan bayonot e’lon qildi.
«Alfonso Devis Chempionlar Ligasi yarim finali doirasidagi «Pari Sen-Jermen»ga qarshi javob o‘yinida chap oyog‘i son qismining orqa mushaklaridan jarohat oldi. Shu sababli u bir necha haftaga safdan chiqdi.
Senga tezroq sog‘ayib ketishingni tilaymiz, Fonzi!», — deyiladi myunxenliklar xabarida.
Joriy mavsumda Devis barcha turnirlar doirasida 23 ta uchrashuvda ishtirok etib, bitta gol va 5 ta samarali uzatmaga mualliflik qildi. Futbolchining klub bilan amaldagi shartnomasi 2030 yilning yoziga qadar mo‘ljallangan.
Transfermarkt portali ma’lumotlariga ko‘ra, kanadalik himoyachining bozor qiymati 45 million yevroni tashkil etadi.
