«Barselona» va «Liverpul» Keniyada o’rtoqlik uchrashuvi o’tkazadi
"Barselona" va "Liverpul" mavsumoldi tayyorgarlik doirasida Keniya poytaxti Nayrobida o‘rtoqlik o‘yini o‘tkazishi mumkin. Bu haqda Sport.es xabar bermoqda.
Nashr ma’lumotlariga ko‘ra, 2026-yil iyul oyida Kataloniya klubi Birmingemga o‘quv-mashg‘ulot yig‘iniga borishni rejalashtirmoqda. Shundan so‘ng ko‘k-anorranglilar yo Marokashda mahalliy jamoa bilan o‘yin o‘tkazadi, yoki Keniyada mersisaydliklar bilan uchrashadi.
Bundan tashqari, mavsumoldi tayyorgarlikning so‘nggi bosqichida “Barselona” Gamper Kubogini tashkil etadi. Eslatib o‘tamiz, Joan Gamper Kubogi — Kataloniya klubi tomonidan o‘tkaziladigan har yilgi o‘rtoqlik turniridir. U birinchi marta 1966-yilda kataloniyaliklar prezidenti Enrike Lyodet tashabbusi bilan o‘tkazilgan. Sovrin “Barselona” asoschisi, afsonaviy prezident Joan Gamper sharafiga nomlangan.
