«Barselona» Torres bilan shartnomani uzaytirsa, Manchester Cityga 8 mln yevro to‘laydi
Barselona hujumchisi Ferran Torres bilan shartnomani uzaytirishga qaror qilsa, kataloniyaliklar Manchester Cityga qo‘shimcha ravishda 8 million yevro to‘lashi kerak bo‘ladi.
Marca nashri jurnalisti Matteo Morettoning ma’lum qilishicha, bunday shart futbolchining 2022 yil yanvar oyida Manchester Citydan Barselonaga o‘tish bitimiga kiritilgan.
Ayni paytda Torresning Kataloniya klubi bilan amaldagi shartnomasiga yana bir yil qolgan. Biroq klub bir necha oydan buyon uning kelishuvini uzaytirish borasida hech qanday amaliy qadam tashlamagan. Shu bois ispaniyalik hujumchi o‘zini klubning ustuvor rejalariga kirmaydi, deb hisoblamoqda.
Manbaga ko‘ra, Torres yangi shartnoma imzolamasdan ham kelasi mavsumni Barselonada o‘tkazishi mumkin. Biroq PSJning qiziqishi vaziyatni tubdan o‘zgartirishi ehtimoldan xoli emas.
