«Barselona» muxlisi «Nyukasl» stadionini uchinchi divizon jamoasi stadioni bilan adashtirib yubordi
«Barselona» muxlisining UEFA Chempionlar Ligasi doirasidagi «Nyukasl»ga qarshi safar o‘yiniga (1:1) tashrif buyurish istagi qiziqarli sarguzasht bilan yakunlandi. Futbol ishqibozi shahar va stadion nomlaridagi o‘xshashlik sababli adashib, London va Nyukasl o‘rniga Devon grafligiga yo‘l olgan va «Ekseter Siti» klubining uy arenasi — «Sent-Jeyms Park» stadioniga yetib kelgan.
«Ekseter Siti» klubining ijtimoiy tarmoqlardagi rasmiy sahifasida ushbu voqea yuzasidan quyidagi izoh berildi:
«Bu ikki shahar va ikki mutlaqo farqli stadion o‘rtasidagi voqea bo‘ldi. Ispaniyalik futbol ishqibozi London orqali Devon tomon yo‘l olib, «Nyukasl»ga qarshi o‘yinni tomosha qilish ilinjida Adam Stensfild tribunasi turniketidan o‘tdi. U xatosini faqat chiptasini stadion xodimlariga ko‘rsatgan chog‘da anglab yetdi.
Biroq o‘sha oqshom u baribir futbol tomosha qilishga muvaffaq bo‘ldi: «Ekseter Siti» xodimlari unga «Linkoln Siti»ga qarshi o‘yinga kirish uchun ruxsatnoma taqdim etishdi va u haqiqiy «Sent-Jeyms Park» stadionidagi chiroqlar ostida futbol zavqini tuya oldi!»
Futbol olamida muxlislarning geografik xatolarga yo‘l qo‘yishi tez-tez uchrab turadi, biroq bu safargi voqea «Ekseter Siti» klubining mehmondo‘stligi tufayli xalqaro miqyosdagi yoqimli xotiraga aylandi.
