“Barselona” hujum uchun Alvares, Keyn va Holand variantlarini ko‘rib chiqmoqda
“Barselona” hujum chizig‘ini kuchaytirish uchun yuqori saviyadagi markaziy hujumchi izlamoqda. Kataloniya klubining asosiy variantlaridan biri “Atletiko Madrid” forvardi Xulian Alvares bo‘lib turibdi. Agar argentinalik futbolchini transfer qilishning imkoni bo‘lmasa, klub Harri Keyn va Erling Holand nomzodlarini ham ko‘rib chiqishi mumkin. Bu haqda talkSPORT xabar bermoqda.
Manbaga ko‘ra, “Barselona” yozgi transfer oynasidayoq hujum markazini kuchaytirish ustida ishlagan. Klub rahbariyati kelgusi transfer davrlari uchun bir nechta yirik nomzodni kuzatmoqda va Alvares hozircha eng jiddiy variantlardan biri sifatida qayd etilmoqda.
Agar Alvares bilan kelishuv amalga oshmasa, kataloniyaliklar “Bavariya” hujumchisi Harri Keyn yoki “Manchester Siti” yulduzi Erling Holand variantiga o‘tishi mumkin. Biroq har ikki transfer ham moliyaviy va shartnoma masalalari sabab “Barselona” uchun oson bo‘lmasligi kutilmoqda.
Ma’lumot uchun, Xulian Alvaresning “Barselona”ga o‘tish ehtimoli avval ham matbuotda tilga olingan. “Atletiko Madrid” esa futbolchini qo‘yib yuborishga shoshilmayapti. Shu sabab kataloniyaliklar hujumchi masalasida bir vaqtning o‘zida bir nechta variantni nazorat qilib bormoqda.
