“Atletiko” Viktor Osimhen transferidan voz kechdi
“Galatasaroy” hujumchisi Viktor Osimhen yozgi transfer oynasida Madridning “Atletiko” klubiga taklif qilingan.
Xabarlarga ko‘ra, futbolchining vakillari 27 yoshli nigeriyalik hujumchini taxminan 75 million yevroga sotib olish mumkinligini ma’lum qilgan. Osimhenning o‘zi esa Diyego Simeone jamoasiga qo‘shilish uchun maoshini kamaytirishga ham tayyor bo‘lgan.
Biroq “Atletiko” muzokaralarni davom ettirmaslikka qaror qilgan. Madrid klubi bunday transfer uchun yetarli moliyaviy imkoniyatga ega emasligini, shuningdek, markaziy hujumchi pozitsiyasida Xulian Alvaresga to‘liq ishonishini bildirgan.
Osimhenning xizmatlari “Barselona”, “Tottenhem” va “Arsenal”ga ham taklif qilingan. Hujumchi o‘tgan mavsumda 33 uchrashuvda 22 ta gol urib, 8 ta golli uzatma bergan.
