«Atletiko» Sørlotni sotishga tayyor
Futbolchining "matraschilar" bilan shartnomasi 2028 yil yozigacha mo‘ljallangan.
ФОТО: Getty images
"Atletiko" hujumchi Aleksandr Sørlotni sotish variantini ko‘rib chiqmoqchi. Bu haqda jurnalist Matteo Moretto xabar tarqatmoqda.
Manbaga ko‘ra, agar klubga munosib taklif tushsa, madridliklar uni ko‘rib chiqishga tayyor. "Atletiko" 30 yoshli futbolchi uchun 35-40 mln yevro talab qilmoqda.
Ma’lumot uchun, Sørlot madridliklar safida 2024 yil yozidan beri to‘p suradi. Norvegiyalik hujumchi joriy mavsum barcha musobaqalarda 22 o‘yin o‘tkazib, 5 ta gol urdi va 1 ta golli uzatma amalga oshirdi.
Futbolchining shartnomasi 2028 yil yozigacha mo‘ljallangan. Transfermarkt portali uning transfer qiymatini 20 mln yevro deb baholamoqda.
Roziqjon Sultonmurodov
Jurnalist