Artetaning oʻgʻli «Arsenal» U18 jamoasi safida debyut qildi
«Arsenal» bosh murabbiyi Mikel Artetaning to‘ng‘ich o‘g‘li Gabriel Arteta London klubining 18 yoshgacha bo‘lgan (U18) yoshlar jamoasida debyut qildi. Bu haqda ESPN nashri xabar bermoqda.
16 yoshli Gabriel Arteta Bernal fevral oyidayoq «Arsenal» U18 jamoasining «Ipsvich»ga qarshi o‘rtoqlik o‘yini qaydnomasiga kiritilgan edi.
Chorshanba kuni esa Gabrielning U18 jamoasidagi to‘liq debyuti amalga oshdi. «Blekbern»ning tengqur futbolchilariga qarshi kechgan bahsning 70-daqiqasida zaxiradan maydonga tushgan Bernal jamoasining 3:0 hisobidagi g‘alabasiga o‘z hissasini qo‘shdi.
ESPN nashrining ta’kidlashicha, «Everton», «PSJ» va «Arsenal» klublarida markaziy yarimhimoyachi sifatida to‘p surgan otasidan farqli o‘laroq, Gabriel vinger pozitsiyasida harakat qiladi.
