«Arsenal» Zinchenkoning «Ayaks»ga oʻtishidan qancha foyda koʻrishi maʼlum boʻldi
Londonning «Arsenal» klubi chap qanot himoyachisi va Ukraina terma jamoasi a’zosi Aleksandr Zinchenko APLni tark etib, Niderlandiya chempionatiga ko‘chib o‘tishga yaqin turibdi.
Taniqli insayder Fabrisio Romanoning ijtimoiy tarmoqlardagi xabariga ko‘ra, bugun, 30 yanvar kuni futbolchi Amsterdamga yo‘l oladi va u yerda mahalliy «Ayaks» klubi bilan shartnoma imzolaydi.
Ushbu transferning moliyaviy tafsilotlari ham ma’lum: Amsterdam klubi Zinchenko uchun «kanonirlar»ga 1,5 million yevro to‘laydi. Shuningdek, kelishuvda futbolchining Chempionlar Ligasidagi ko‘rsatkichlariga qarab qo‘shimcha bonuslar ham ko‘zda tutilgan.
Ma’lumot o‘rnida, Aleksandr joriy mavsumning birinchi qismini ijara asosida «Nottingem Forest» safida o‘tkazdi. U «o‘rmonchilar» tarkibida 10 ta uchrashuvda maydonga tushdi, biroq samarali harakatlarni amalga oshira olmadi. Tajribali himoyachining «Arsenal» bilan amaldagi bitimi 2026 yilning iyuniga qadar mo‘ljallangan edi.
