«Arsenal» Morgan Rogers transferiga yaqinlashmoqda
Londonning Arsenal klubi Aston Villa vingeri Morgan Rogers transferi bo‘yicha muzokaralarni davom ettirmoqda. Bu haqda Sky Sports jurnalisti Sasha Tavolieri xabar berdi.
Manbaga ko‘ra, ikki klub vakillari doimiy aloqada bo‘lib turibdi. Muzokaralar ijobiy ruhda kechmoqda va tomonlar asta-sekin kelishuvga yaqinlashmoqda.
Shuningdek, Arsenal 23 yoshli ingliz futbolchisi bilan shaxsiy shartnoma bo‘yicha asosiy shartlarni ham kelishib olgan. Yangi bitim 2031 yilning iyun oyigacha amal qilishi rejalashtirilgan.
Xabar qilinishicha, Rogers Aston Villa rahbariyatiga joriy yozda Arsenal’ga o‘tish istagini bildirgan. Bu esa muzokaralarning yanada tezlashishiga xizmat qilmoqda.
Birmingem klubi ham futbolchining ketishi ehtimoli yuqori ekanini inobatga olib, uning o‘rniga munosib nomzod izlashni boshlagan.
