“Arsenal” Mikel Arteta bilan shartnomani uzaytirdi
“Arsenal” bosh murabbiyi Mikel Arteta bilan yangi uzoq muddatli shartnoma imzolanganini rasman e’lon qildi. Yangi kelishuv ispaniyalik mutaxassisni London klubida 2029/30-yilgi mavsum yakuniga qadar olib qoladi. Bu haqda “Arsenal” rasmiy sayti xabar bermoqda.
Manbaga ko‘ra, Arteta yangi shartnoma imzolaganidan so‘ng klub bilan hali katta maqsadlari borligini ta’kidlagan. Murabbiy “Arsenal”dagi faoliyatini davom ettirishni o‘zi uchun katta sharaf deb atab, jamoaning so‘nggi yillardagi rivojlanishi hali boshlanishi ekanini bildirgan.
Artetaning avvalgi kelishuvi joriy mavsum yakunida nihoyasiga yetishi kerak edi. Klub rahbariyati esa o‘tgan mavsumdagi muvaffaqiyatlardan so‘ng murabbiy bilan hamkorlikni davom ettirishga qaror qildi. “Arsenal” o‘tgan mavsum Angliya chempionligini qo‘lga kiritib, 2004-yildan beri ilk bor Premyer-liga g‘olibiga aylangan edi.
Ma’lumot uchun, Mikel Arteta “Arsenal”ni 2019-yil dekabridan buyon boshqarib kelmoqda. Shu vaqt davomida londonliklar uning qo‘l ostida 360 ta uchrashuv o‘tkazib, 224 ta g‘alaba, 60 ta durang va 76 ta mag‘lubiyat qayd etgan.
