«Arsenal» Konega qiziqmoqda
"Arsenal" klubi "Roma" yarim himoyachisi Manu Koneni transfer qilish imkoniyatini ko‘rib chiqmoqda. Bu haqda Corriere della Sera nashri xabar berdi.
Manbaga ko‘ra, hozircha londonliklar tomonidan futbolchiga rasmiy taklif yuborilmagan, ammo "kanonirlar" uning atrofidagilar bilan dastlabki muzokaralarni boshlab bo‘lgan. Konening "Roma" bilan amaldagi shartnomasi 2029 yilgacha mo‘ljallangan.
Shuningdek, "Aston Villa" ham ushbu futbolchini o‘z safiga qo‘shib olish imkoniyatini ko‘rib chiqmoqda.
O‘tgan mavsumda Manu Kone barcha musobaqalarda 37 ta o‘yinda maydonga tushib, 2 ta gol urdi va 3 ta golli uzatmani amalga oshirdi. Hozirda u Italiya A Seriya chempionatidagi eng qimmat futbolchilardan biri bo‘lib, top-10likka kiradi. Transfermarkt ma’lumotiga ko‘ra, uning bozor qiymati 50 million yevroga baholanmoqda.
