«Arsenal» «Inter» hujumchisiga qiziqish bildirmoqda
Londonning «Arsenal» klubi «Inter»ga tegishli bo‘lgan 23 yoshli hujumchi Sebastyano Espozitoni yozgi transfer oynasi uchun asosiy maqsadlaridan biri sifatida belgiladi. Futbolchi o‘tgan yilning avgust oyidan buyon ijara asosida «Kalyari» safida to‘p surmoqda. Bu haqda Football Transfers nashri xabar berdi.
Manbaning ma’lum qilishicha, «kanonirlar» sport direktori Andrea Berta Italiyada faoliyat yuritayotgan skautlardan futbolchi haqida batafsil ma’lumot so‘ragan. «Arsenal» Espozitoni dastlab zaxira hujumchisi sifatida ko‘rmoqda, biroq kelajakda uning asosiy tarkib darajasidagi futbolchiga aylanishiga ishonmoqda.
Joriy mavsumda Sebastyano Espozito barcha turnirlarda 26 ta uchrashuvda maydonga tushib, 4 ta gol va 5 ta golli uzatmani amalga oshirdi. Transfermarkt portali ma’lumotlariga ko‘ra, italiyalik hujumchining bozor qiymati 9 million yevroni tashkil etadi.
