«Arsenal» Endrikni o‘z safiga qo‘shib olmoqchi
“Arsenal” klubi Madridning “Real” klubiga tegishli bo‘lgan, ayni damda ijarada Fransiyaning “Lion” jamoasida to‘p surayotgan hujumchi Endrikni o‘z safiga qo‘shib olishi mumkin. Bu haqda Caught Offside nashri xabar berdi.
London klubi yangi mavsum oldidan hujum chizig‘ini kuchaytirishni maqsad qilgan. Hozircha “to‘pchilar” 19 yoshli braziliyalik forvard borasida rasmiy taklif bilan chiqishgani yo‘q.
Hujumchi “Lion”dagi ijara muddati yakunlangach, yana Madridga qaytishni va “qirolicha klubi”ning asosiy tarkibidan joy olishni o‘z oldiga maqsad qilib qo‘ygan.
Endrik joriy mavsumda barcha turnirlar doirasida jami 20 ta o‘yinda maydonga tushib, raqiblar darvozasiga 7 ta gol urdi va yana shuncha (7 ta) golli uzatmani amalga oshirdi. Futbolchining “Real Madrid” bilan amaldagi shartnomasi 2030 yilning yozigacha imzolangan. Transfermarkt portalining so‘nggi ma’lumotlariga ko‘ra, hujumchining bozor qiymati 35 million yevroni tashkil etmoqda.
