«Arsenal» Chempionlar Ligasida 12 ta oʻyindan beri yutqazmayapti
Londonning «Arsenal» klubi UEFA Chempionlar Ligasi chorak final javob uchrashuvida «Sporting» bilan durang o‘ynadi (0:0) va dastlabki bahsdagi 1:0 hisobidagi g‘alaba evaziga yarimfinalga yo‘llanma oldi.
Shu tariqa, «to‘pchilar» joriy mavsumdagi 12 ta uchrashuvning birortasida ham mag‘lubiyatga uchrashmadi.
Mikel Arteta shogirdlari umumiy bosqichda «Atletik Bilbao» (2:0), «Olimpiakos» (2:0), «Atletiko Madrid» (4:0), «Slaviya» (3:0), «Bavariya» (3:1), «Bryugge» (3:0), «Inter» (3:1) va «Qayrat» (3:2) jamoalarini mag‘lub etishdi. 1/8 finalda esa «Bayer» to‘sig‘idan o‘tildi (1:1, 2:0). Endilikda yarimfinalda «Arsenal»ni yana «Atletiko» bilan bahs kutmoqda.
Musobaqaning hal qiluvchi uchrashuvi 2026 yil 30 may kuni Budapeshtdagi (Vengriya) «Pushkash Arena» stadionida bo‘lib o‘tadi. Eslatib o‘tamiz, Chempionlar Ligasining amaldagi g‘olibi Fransiyaning «Pari Sen-Jermen» klubi hisoblanadi.
