\"Arsenal\" \"Chelsi\" Kasado uchun kurashadi
“Barselona” yarim himoyachisi Mark Kasado faoliyati Yevropaning ko‘plab klublari diqqat markazida turibdi. Bu haqda Caught Offside nashri xabar berdi.
Manbaga ko‘ra, Angliyaning ikki top klubi — “Arsenal” hamda “Chelsi” jamoalari 21 yoshli futbolchiga jiddiy qiziqmoqda.
Kasado va “Barselona” o‘rtasida tuzilgan shartnomada futbolchining tovon puli 100 million yevro qilib ko‘rsatilgan. Shunga qaramay, “ko‘k-anorranglilar” yozgi transfer oynasida moliyaviy barqarorlikni ta’minlash maqsadida futbolchini arzonroq narxda qo‘yib yuborishga tayyor.
Mark Kasado “Barselona” akademiyasi tarbiyalanuvchisi hisoblanadi. U o‘tgan mavsumda barcha musobaqalar doirasida 36 ta o‘yinda maydonga tushib, o‘z hisobiga 1 gol va 6 golli uzatma yozdirib qo‘ygan.
Yarim himoyachining “Barselona” bilan shartnomasi 2028 yilning yozigacha amal qiladi. Transfermarkt portali futbolchining qiymatini 30 million yevroga baholagan.
