«Arsenal» Angliya Kubogi rekordini oʻrnatdi
Angliya Kubogi doirasida bo‘lib o‘tgan uchrashuvda «Arsenal» «Uigan Atletik» jamoasini 4:0 hisobida mag‘lubiyatga uchratdi. Londonliklar o‘yinning dastlabki 30 daqiqasidayoq raqib darvozasiga to‘rtta to‘p kiritishga muvaffaq bo‘lishdi.
Opta Sports ma’lumotlariga ko‘ra, «Arsenal» mazkur turnir tarixida (1992/93-yilgi mavsumdan buyon) uchrashuvning dastlabki yarim soatida raqib darvozasini to‘rt bor ishg‘ol qilgan ilk Premyer-liga jamoasiga aylandi.
Hozirgi vaqtda «Arsenal» APL turnir jadvalida ham peshqadamlik qilmoqda. Ikkinchi o‘rinda borayotgan «Manchester Siti» «kanonirlar»dan to‘rt ochko ortda qolmoqda. Londonliklar navbatdagi uchrashuvini shu chorshanba kuni mehmonda «Vulverxempton»ga qarshi o‘tkazishadi. Mazkur bahs APL doirasida bo‘lib o‘tadi.
