«Arsenal» Angliya futboli tarixiga kirdi
Londonning «Arsenal» klubi oʻz maydonida boʻlib oʻtgan Angliya Liga Kubogining toʻrtinchi bosqichida «Brayton»ni 2:0 hisobida magʻlub etib, Angliya futboli tarixida yangi rekord oʻrnatdi.
Statistik maʼlumotlarni taqdim etuvchi Opta Sport portalining yozishicha, «kanonirlar» Angliya oliy divizioni tarixida bir oy ichida oltita oʻyin oʻtkazib, ularning barchasida gol oʻtkazib yubormagan ilk jamoa boʻldi.
Avvalroq «Arsenal» Angliya Premyer-ligasida «Kristal Pelas» (1:0), «Fulhem» (1:0) va «Vest Hem» ustidan gʻalaba qozongan edi.
Shuningdek, Chempionlar ligasida londonliklar «Atletiko» (4:0) hamda «Olimpiakos»ni (2:0) magʻlub etishgan, Liga Kubogida esa «Brayton»dan (2:0) ustun kelishdi.
Shu tariqa, Mikel Arteta shogirdlari bir oy davomida oʻtkazilgan barcha oltita uchrashuvda darvozasi daxlsizligini saqlab, tarixiy natijaga erishdi.
