Arbeloa «Real» sardorlari bilan inqirozli yigʻilish oʻtkazdi
Madridning «Real» klubi bosh murabbiyi Alvaro Arbeloa La Ligadagi ketma-ket ikkinchi mag‘lubiyatdan so‘ng inqirozli yig‘ilish o‘tkazdi. COPE nashri xabariga ko‘ra, murabbiy avval jamoa sardorlari, so‘ngra barcha futbolchilar va murabbiylar shtabi bilan uchrashgan.
Manbaning ta’kidlashicha, ispaniyalik mutaxassis jamoadan «mavsumning yakuniy bosqichida qo‘shimcha kuch sarflashni» so‘ragan. Qayd etilishicha, «qirollik klubi» futbolchilari vaziyat qanchalik qaltis ekanini tushunib turgan bo‘lsalar-da, mavsumni muvaffaqiyatli yakunlashdan umid uzishmagan.
Eslatib oʻtamiz, dushanba, 2 mart kuni Arbeloa shogirdlari La liganing 26-turida «Xetafe»ga (0:1) imkoniyatni boy berishdi. Bungacha, 21 fevral kuni «Real» o‘z maydonida «Osasuna»dan (1:2) mag‘lubiyatga uchragan edi.
