APLda eng koʻp xatoga yoʻl qoʻyadigan futbolchilar eʼlon qilindi
ESPN nashri Angliya Premyer-ligasining himoyada pozitsion xatoga eng ko‘p yo‘l qo‘yadigan futbolchilari ro‘yxatini e’lon qildi. Unga ko‘ra, «Chelsi» qanot himoyachilari Ris Jeyms va Malo Gusto ushbu ko‘rsatkich bo‘yicha ligadagi eng yomon natijani qayd etishdi.
Nashr ma’lumotlariga ko‘ra, faqatgina ushbu ikki futbolchi har 30 daqiqalik o‘yin vaqtida uchtadan ko‘p pozitsion xatoga yo‘l qo‘ymoqda. Jeyms har yarim soatda o‘rtacha 3,89, Gusto esa 3,12 marta o‘z pozitsiyasini yo‘qotib qo‘ygan. Markaziy himoyachilar orasida esa eng yomon ko‘rsatkich «Liverpul» a’zosi Ibraima Konatega tegishli bo‘lib chiqdi.
Joriy mavsumda Ris Jeyms barcha turnirlarda 30 ta, Malo Gusto esa 33 ta uchrashuvda maydonga tushdi. «Chelsi» APLning 26 turida o‘z darvozasidan 30 ta gol o‘tkazib yuborgan holda, 44 ochko bilan turnir jadvalida beshinchi o‘rinni egallab turibdi.
