APL. «Tottenhem» — «Man Siti». Asosiy tarkiblar eʼlon qilindi
Bugun, 1 fevral kuni Angliya Premyer-ligasining 24-turi doirasida turning markaziy o‘yinlaridan biri bo‘lib o‘tadi. Unda «Tottenhem» oʻz maydonida «Manchester Siti»ni qabul qiladi.
Uchrashuvni Robert Jons boshchiligidagi hakamlar brigadasi boshqarib boradi. O‘yin Toshkent vaqti bilan 21:30 da start oladi.
O‘zbekistonlik futbol muxlislari uchun quvonarli jihati shundaki, «shaharliklar» himoyachisi Abduqodir Husanov ushbu muhim bahsni asosiy tarkibda boshlaydigan bo‘ldi.
«Tottenhem»: Vikario, Dregushin, Palinya, Simons, Bissuma, Udodji, Grey, Romero, Solanke, Gallaher, Kolo Muani.
«Manchester Siti»: Donnarumma, Nunes, Husanov, Gehi, Ait-Nuri, Rodri, Silva, O’Rayli, Semenyo, Sherki, Holand.
Ayni damda «shporlar» 23 turdan so‘ng 28 ochko bilan turnir jadvalining 14-pog‘onasida bormoqda. Pep Gvardiola shogirdlari esa 46 ochko bilan ikkinchi o‘rinni egallab turibdi va peshqadam «Arsenal»ni quvishda davom etmoqda.
Kelasi turda «Tottenhem»ni «Manchester Yunayted»ga qarshi bahs kutayotgan bo‘lsa, «Manchester Siti» o‘z maydonida prinsipial raqibi «Liverpul»ni qabul qiladi.
