APL klublari maosh chegarasiga qarshi ovoz berishdi
Angliya Premyer-ligasi klublari liga doirasida maoshlar uchun «potolok» joriy etish taklifiga qarshi ovoz berdi. Bu haqda BBC xabar bermoqda. Shu bilan birga, eng kam zarur ovoz bilan tarkib xarajatlari koeffitsienti — SCR (Squad Cost Ratio) tizimini joriy etish ma’qullandi.
Manbaga ko‘ra, maoshlar bo‘yicha cheklov kiritish masalasida o‘tgan ovoz berishda yetti klub «ha», 12 klub «yo‘q» deb ovoz bergan, yana bir ishtirokchi esa betaraf qolgan.
SCR bo‘yicha ovoz berishda esa 14 klub «ha» deb ovoz berdi — bu yangi qoida qabul qilinishi uchun zarur bo‘lgan minimal chegaradir. APLning olti klubi bu qarorga qarshi chiqdi.
Qabul qilingan tartibga ko‘ra, klublarning umumiy tarkib xarajatlari (futbolchilar va murabbiylar shtabi maoshlari, shuningdek transfer to‘lovlari va agentlar komissionlari) 2026/2027 yilgi mavsumdan boshlab klub daromadining 85 foizi bilan cheklanadi. Yevrokuboklarda qatnashadigan klublar uchun esa bu ko‘rsatkich UEFA talablariga binoan baribir 70 foiz etib belgilanadi.
