APL. «Arsenal» «Fulhem»ni yirik hisobda mag‘lub etdi
Angliya Premyer-ligasining 35-turi doirasida Londonning «Arsenal» klubi o‘z maydoni — «Emireyts» stadionida «Fulhem» jamoasini qabul qildi. Avstraliyalik hakam Jarred Jillett boshqarib borgan ushbu uchrashuv «kanonirlar»ning 3:0 hisobidagi ishonchli g‘alabasi bilan yakunlandi.
Uchrashuvning 9-daqiqasida Viktor Gyokeres hisobni ochgan bo‘lsa, 40-daqiqaga kelib Bukayo Saka oradagi farqni ikkitaga oshirdi. Birinchi bo‘limga qo‘shib berilgan to‘rtinchi daqiqada (45+4) Gyokeres o‘zining dublini rasmiylashtirib, o‘yinga amalda nuqta qo‘ydi.
Ushbu g‘alabadan so‘ng «Arsenal» o‘z ochkolari sonini 76 taga yetkazib, turnir jadvalida yakka peshqadamlikni davom ettirmoqda. Jamoaning eng yaqin ta’qibchisi — «Manchester Siti» bilan oradagi farq hozirda 6 ochkoni tashkil etmoqda. Biroq ta’kidlash joizki, «shaharliklar» hisobida hali zaxiradagi ikkita o‘yin mavjud. «Fulhem» esa mag‘lubiyatdan so‘ng 48 ochko bilan jadvalning 10-pog‘onasida qoldi.
Chempionlik poygasida borayotgan «Arsenal» navbatdagi turni 10 may kuni mehmonda «Vest Hem»ga qarshi o‘tkazadi. «Fulhem» esa 9 may kuni o‘z maydonida «Bornmut»ni qabul qiladi.
