Antoni Marsyal jarohati sabab nomaʼlum muddatga safdan chiqdi
«Manchester Yunayted»ning sobiq hujumchisi, hozirda Meksikaning «Monterrey» klubida to‘p tepayotgan Antoni Marsyal Meksika Klauzurasi 6-turi doirasidagi «Leon»ga qarshi o‘yinda (1:0) o‘ng yelkasi chiqib ketishi natijasida jarohat oldi. Bu haqda jamoaning rasmiy sayti xabar tarqatdi.
Marsyal «Lion» akademiyasi tarbiyalanuvchisi bo‘lib, faoliyati davomida «Monako», «Manchester Yunayted», «Sevilya» va Gretsiyaning «AEK» klublarida harakat qilgan. Transfermarkt portali fransiyalik futbolchining ayni damdagi bozor qiymatini 6 million yevroga baholamoqda.
«Manchester Yunayted» safida Marsyal Angliya Kubogi, ikkita Liga Kubogi, mamlakat Superkubogi va Yevropa Ligasida g‘olib chiqqan. Fransiya terma jamoasi bilan esa Millatlar Ligasi chempionligini qo‘lga kiritgan.
