Andrey Arshavin Portugaliya terma jamoasining O‘zbekistonga qarshi o‘yiniga baho berdi
Rossiyalik sobiq futbolchi JCh-2026 guruh bosqichi 2-turi doirasida o‘tkazilgan Portugaliya — O‘zbekiston uchrashuvida portugaliyalik futbolchilarda ko‘p jihatlar yaxshi o‘xshaganini ta’kidladi.
Arshavinning fikricha, ikki jamoa o‘rtasidagi klass farqi o‘yin davomida sezilib turgan. U O‘zbekiston terma jamoasi uchun asosiy bahs oldinda — DR Kongoga qarshi uchrashuv bo‘lishini ham qayd etdi.
Sobiq futbolchi Portugaliya uchun erta kiritilgan gol muhim rol o‘ynaganini aytdi. Ayniqsa, Krishtianu Ronalduning gol urgani alohida ahamiyatga ega bo‘lganini ta’kidladi.
“Bugun portugaliyaliklarda ko‘p narsa o‘xshadi. Eng muhimi, ular boshida gol urishdi va aynan Ronaldu gol kiritdi”, — dedi Arshavin.
Eslatib o‘tamiz, Portugaliya mazkur uchrashuvda O‘zbekistonni 5:0 hisobida mag‘lub etdi. Ronaldu esa bahsda dubl qayd etib, jamoasining yirik g‘alabasiga hissa qo‘shdi.