Andreas Kristensen «Barselona» bilan yangi shartnoma imzolaydi
Yarimhimoyachi Andreas Kristensen «Barselona» klubi bilan amaldagi kelishuv muddatini uzaytiradi. Bu haqda taniqli jurnalist va insayder Fabrisio Romano X ijtimoiy tarmog‘idagi sahifasida xabar tarqatdi.
Manbaning ma’lum qilishicha, tomonlar 2028-yilning yoziga qadar mo‘ljallangan yangi mehnat shartnomasini imzolashadi. Futbolchiga Angliya va Italiya klublari tomonidan jiddiy qiziqishlar bo‘lganiga qaramay, daniyalik xavbek uchun ko‘k-anorranglilar safida qolish asosiy ustuvor vazifa hisoblanadi.
Yakunlangan mavsumda Kristensen «Barselona» tarkibida barcha turnirlar doirasida 18 ta uchrashuvda maydonga tushib, 1 ta gol urishga muvaffaq bo‘ldi.
Transfermarkt portali bergan ma’lumotlarga ko‘ra, futbolchining ayni damdagi transfer bahosi 8 million yevroni tashkil etadi. Eslatib o‘tamiz, yarim himoyachi muqaddam Myonxengladbaxning «Borussiya» hamda Londonning «Chelsi» klublari sharafini himoya qilgan.
