«Andijon»ning Antaliyadagi uchinchi oʻyini ham ortda qoldi
“Andijon” klubining Antaliya yigʻini doirasidagi uchinchi oʻrtoqlik uchrashuvi oldin xabar berib oʻtganimizdek, Makedoniyaning 11 karra chempioni - “Vardar” jamoasiga qarshi boʻlib oʻtdi.
Bellashuv ancha sifatli tarzda kechdi. Jamoamiz kuchli raqibga qarshi munosib oʻyin namoyish qildi. Murabbiylar ushbu uchrashuvda ham ikki xil tarkibdan foydalandi. Taʼkidlash lozimki, har ikkala boʻlimda ham futbolchilarimiz oʻz pozitsiyalarida ishonchli harakat qildilar. Gollar esa tanaffusdan keyin kiritildi.
“Andijon” ikkinchi boʻlimni 1:0 bilan boshladi, desa ham boʻlaveradi. Negaki, tezkor gol koʼrdik. 46-daqiqada ajoyib hujum uyushtirdik va uni Usmonali Ismonaliyev gol bilan yakunlashga muvaffaq boʻldi. Shundan keyin ham “Burgutlar” oʻyinni tartibli ravishda olib borishdi va yana raqib darvozasi oldida xavfli vaziyatlarni sodir etdi.
Oʻyin goʻyoki 1:0 bilan yakunlanadigandek edi. Biroq boʻlim oxirlariga yaqin “Vardar” vaziyatdan foydalanib hisobni tenglashtirdi.
Umuman olganda, “Andijon” har jabhada kuchli raqibga qarshi munosib oʻynadi va ustunlikka ham erishdi. Oʻtkazilayotgan har bir oʻrtoqlik uchrashuvi jamoamiz aʼzolari uchun foydali boʻlmoqda va bu albatta oʻz samarasini beradi.
“Vardar” (Makedoniya) - “Andijon” - 1:1 (0:0).
Gollar: Usmonali Ismonaliyev, 46 - 0:1. David Babunski, 77 - 1:1.
“Andijon”: Rahimjon Davronov, Nemanya Chalasan, Igor Golban, Islom Toʻxtaxoʻjayev, Ibrohim Yoʻldoshev, Xumoyunmirzo Iminov, Aleksandr Andronikashvili, Usmonali Ismonaliyev, Dragan Cheran, Imeda Ashortia, Martin Boake.
Ikkinchi boʻlimda maydonga tushganlar: Neʼmatulloh Rustamjonov, Odil Abdumajidov, Abdulvohid Gʻulomov, Kristian Novak, Abdurahmon Komilov, Bekzod Sulaymonov, Sardor Azimov, Abbos Abdugʻafforov, Sayfiddin Sodiqov, Poʻlatxoʻja Xoldorxonov, Asilbek Aliyev.
