«Andijon» – «Surxon». Jamoalarning o‘zaro o‘yinlar tarixi
Superliga qaytmoqda. 11-turdan keyin jahon chempionati sababli Superligada tanaffus e’lon qilingandi.
Endilikda yana milliy birinchiligimiz davom ettiriladi. “Andijon” jamoasi chempionatning 12-turini 18-iyul kuni “Bobur arena”da Termizning “Surxon” klubiga qarshi o‘tkazadi.
“Bobur arena”da ushbu jamoalar o‘rtasidagi so‘nggi bor o‘tkazilgan bahs 2025-yilning 23-may kuni bo‘lib o‘tgan. Qiziqarli o‘tgan o‘yinda “Andijon” g‘alaba qozongan – 2:1. O‘shanda jamoamizdan Bektemir Abdumannonov bilan Doniyor Abdumannopov raqib darvozasini ishg‘ol qilishgan. Ikkinchi davradagi uchrashuvda esa “Surxon” o‘z uyida 4:0 hisobida ustun kelgan.
Klublarning chempionatdagi ilk to‘qnashuvi 1992-yildan boshlangan. Umumiy hisobda jamoalar milliy chempionatda 36 marta to‘qnash kelishgan. “Surxon”da 12, “Andijon”da 18 g‘alaba bor. 6 ta bahsda kuchlar teng kelgan. To‘plar nisbati 48\64 jamoamiz foydasiga.
Eslatib o‘tamiz, “Andijon” – “Surxon” qarama-qarshiligi 18-iyul kuni soat 20:00 da boshlanadi.
