“Andijon” Antaliyada navbatdagi oʻrtoqlik oʻyinida maydonga tushadi
Aniq reja asosida Antaliyada oʻquv-mashgʻulot yigʻinlarini olib borayotgan “Andijon” jamoamiz mazkur tayyorgarlik doirasida navbatdagi oʻrtoqlik uchrashuviga ham yetib keldi. Bizning bu safargi sparring-raqibimiz - Qozogʻistonning “Kaspiy Aktau” jamoasi.
Ushbu klub oʻtgan yili Qozogʻiston birinchi divizionida birinchi oʻrinni egallab Qozogʻiston premyer-ligasiga yoʻllanmani qoʻlga kiritdi.
Klub 1979-yilning 1-yanvarida tashkil topgan. Jamoaga 42 yoshli mahalliy mutaxassis Piraliy Aliyev bosh murabbiylik qilmoqda. U ushbu lavozimga shu yilning 21-yanvar kuni tayinlandi. Shuningdek, 4 kun muqaddam “Kaspiy Aktau” jamoasi portugaliyalik himoyachi Andre Amaral bilan ham shartnoma imzoladi.
“Andijon” - “Kaspiy Aktau” oʻrtasidagi bellashuv 29-yanvar kuni Toshkent vaqti bilan 19:45 da boshlanadi.
