Amorim «MYU»dan boʻshatilganini ogʻir qabul qilmoqda
Ruben Amorim «Manchester Yunayted» bosh murabbiyligidan bo‘shatilgan qarorni og‘ir qabul qilmoqda. Bu haqda Sky Sports mutaxassisning yaqinlariga tayanib xabar berdi.
Manbaga ko‘ra, so‘nggi matbuot anjumanlarida aytilgan gaplarga qaramay, Amorimning klubni tark etish niyati bo‘lmagan. U klub rahbariyati uning ishiga haddan tashqari aralashganini, jumladan sport direktori Jeyson Uilkoks tomonidan kuchli nazorat bo‘lganini his qilgan. Shuningdek, portugaliyalik murabbiy taktik qarorlar borasida to‘liq erkinlikka ega bo‘lmaganini ta’kidlagan.
Amorim jamoa natijalari yetarli darajada yaxshi bo‘lmaganini tan oladi va uning davrida «Yunayted» APLda murabbiylar orasida eng past g‘alaba foizini qayd etganini ham tushunadi.
Shunga qaramay, u lavozimida qolganida jamoani ushbu mavsumdayoq Chempionlar ligasiga olib chiqishiga ishongan. Amorimning fikricha, agar unga hozirning o‘zida qo‘shimcha resurslar ajratilganida, bu nafaqat Chempionlar ligasi yo‘llanmasini, balki klub uchun yanada katta moliyaviy foyda keltirishi mumkin edi.
