Amorim: «Kazemiro shunchaki top-darajadagi futbolchi»
«Manchester Yunayted» bosh murabbiyi Ruben Amorim jamoa yarimhimoyachisi Kazemironing professionalligini yuqori baholadi.
«Agar hamma Kazemiro kabi ishlaganida edi… Bu, avvalo, konsentratsiya haqida. Nega bu futbolchi besh marta Chempionlar ligasini yutganini tushunish qiyin emas. Uning qilayotgan ishlariga e’tibor qaratsangiz — shartnomasi bor yoki yo‘qligidan qat’i nazar — u shunchaki top-darajadagi futbolchi», — deydi Amorim.
Joriy mavsumda braziliyalik yarimhimoyachi «MYU» safida barcha musobaqalarda 15 ta uchrashuvda maydonga tushib, to‘rtta gol va bitta golli uzatmaga mualliflik qildi.
Kazemironing ingliz klubi bilan amaldagi mehnat shartnomasi 2026 yil yozigacha mo‘ljallangan. Transfermarkt portali ma’lumotlariga ko‘ra, futbolchining bozor qiymati 8 mln yevroni tashkil etadi.
