Alfonso Devis JCh-2026’dagi ilk o‘yinida maydonga tushdi
Kanada terma jamoasi himoyachisi Alfonso Devis nihoyat JCh-2026’dagi ilk uchrashuvida maydonga tushdi.
“Bavariya” futbolchisi mundialning 1/16 final bosqichida JAR terma jamoasiga qarshi kechgan bahsda zaxiradan o‘yinga qo‘shildi. Devis uchrashuvning 75-daqiqasida Teyjon Byukenen o‘rniga maydonga tushdi.
Bu uning 2026-yilgi Jahon chempionatidagi birinchi ishtiroki bo‘ldi. Kanada terma jamoasi yetakchilaridan biri hisoblangan Devis guruh bosqichini jarohatdan to‘liq tiklanish zarurati sababli o‘tkazib yuborgan edi.
Alfonso Devisning safga qaytishi Kanada uchun muhim voqea sifatida baholanmoqda. U tezligi, qanotdagi faolligi va hujumga qo‘shilishdagi samaradorligi bilan jamoa o‘yiniga qo‘shimcha kuch berishi mumkin.
Eslatib o‘tamiz, Kanada terma jamoasi guruh bosqichida 4 ochko jamg‘arib, B guruhida ikkinchi o‘rinni egallagan holda pley-offga yo‘l olgan. JAR esa A guruhida 4 ochko bilan ikkinchi o‘rinni qo‘lga kiritgan.
