Aleksis Sanches «Sevilya»ni tark etdi
Ispaniyaning «Sevilya» klubi va chiliyalik hujumchi Aleksis Sanches o‘rtasidagi hamkorlik nihoyasiga yetdi. Futbolchining shartnomasi muddati tugagan va klub uni uzaytirmaslikka qaror qilgan.
Tajribali forvard o‘tgan mavsumda «Sevilya»ning La Ligada o‘z o‘rnini saqlab qolishida muhim hissa qo‘shgan bo‘lsa-da, unga yangi shartnoma taklif qilinmadi.
Manbalarga ko‘ra, Sanches faoliyatini davom ettirish niyatida. Ammo uning keyingi manzili hozircha noma’lum.
Hozircha eng ko‘p tilga olinayotgan variant — A Seriyaga qaytgan «Monza». Biroq bu ma’lumotlar hali rasman tasdiqlangani yo‘q.
Shuningdek, agar yevropalik klublardan munosib taklif bo‘lmasa, sobiq «Barselona» va «Arsenal» futbolchisi faoliyatini o‘z vatanida — Chili chempionatida davom ettirishi ham istisno qilinmayapti.
