“Al-Hilol” va “Al-Ahli” “Barselona” yarim himoyachisi Mark Kasadoga qiziqmoqda
“Barselona” yarim himoyachisi Mark Kasado faoliyatini Saudiya Arabistonida davom ettirishi mumkin. Jurnalist Ekrem Konur ma’lumotiga ko‘ra, “Al-Hilol” va “Al-Ahli” 22 yoshli ispaniyalik futbolchini o‘z safiga qo‘shib olishga qiziqish bildirmoqda.
Manbaning qayd etishicha, har ikki Saudiya klubi Kasado uchun 40 million yevrogacha to‘lashga tayyor. Futbolchining o‘zi esa kelajagi borasida shoshilinch qaror qabul qilmoqchi emas va mavjud takliflarni batafsil o‘rganib chiqishni istamoqda.
Shu bilan birga, Kasadoning kelajagi bo‘yicha ma’lumotlar bir-biridan farq qilmoqda. Fabritsio Romano 17-avgust kuni futbolchining “Barselona”ni tark etishi mumkinligini yozgan, biroq “Al-Hilol” bilan muzokaralar olib borilmayotganini ta’kidlagan.
Ma’lumot uchun, Kasado o‘tgan mavsum “Barselona” safida barcha musobaqalarda 34 ta uchrashuvda maydonga tushib, bitta golli uzatma amalga oshirgan. Uning kataloniyaliklar bilan shartnomasi 2028-yilgacha amal qiladi.
