Agar «Vest Hem» Chempionship'ga tushib ketsa, futbolchilarini ommaviy ravishda sotuvga qoʻyadi
Londonning «Vest Hem» klubi agar jamoa 2025/2026 yilgi mavsum yakunlariga koʻra Angliya Premyer-ligasidagi oʻrnini saqlab qola olmasa, futbolchilarini ommaviy ravishda sotib yuborishni rejalashtirmoqda. Bu haqda The Guardian nashri xabar bermoqda.
Manba bergan maʼlumotlarga koʻra, klub moliyaviy barqarorlikni taʼminlash va moliyaviy feyr-pley (FFP) qoidalariga rioya qilish uchun kamida 100 million funt sterling (€ 115 mln) atrofida futbolchilarni sotishiga toʻgʻri keladi.
Ayni damda «Vest Hem» APL turnir jadvalida 36 ochko bilan 18-oʻrinni egallab turibdi va 17-pogʻonadagi «Tottenhem»dan ikki ochkoga ortda qolmoqda. «Bolgʻachilar»ning mavsumda faqatgina bitta oʻyini qolgan, «shporlar»da esa — ikkita. Agar bugun, 19 may seshanba kuni «Tottenhem» «Chelsi»ni magʻlub etsa, «Vest Hem» muddatidan oldin Chempionshipga ravona boʻlishi mumkin.
