Agar Mareska bosh murabbiy etib tayinlansa, «Chelsi» «Man Siti» ustidan shikoyat qiladi — manba
«Chelsi» klubi agar «Manchester Siti» Enso Mareskani bosh murabbiy etib tayinlasa, «shaharliklar»dan katta miqdorda tovon puli talab qilish niyatida. Agar kompensatsiya toʻlanmasa, London klubi surishtiruv ishlari olib borilishi uchun Angliya Premyer-ligasiga rasman murojaat qilishi mumkin. Bu haqda Daily Mail nashri xabar bermoqda.
Manba bergan maʼlumotlarga koʻra, «Chelsi» rahbariyati italiyalik mutaxassisning hali «koʻklar»ni boshqarib turgan kezlarda «Manchester Siti» bilan yashirincha muzokaralar olib borganidan gʻazabda. Endilikda Mareska «shaharliklar» boshqaruviga kelishga juda yaqin turgani sababli, «Chelsi» qatʼiy choralar koʻrishni boshlamoqchi.
Agar klublar bu masalada oʻzaro tinch yoʻl bilan kelisha olishmasa, «Chelsi» Premyer-ligaga shikoyat kiritadi. Bunda londonliklar «Manchester Siti» rahbariyati Mareska hali «Stemford Bridj»da faoliyat yuritayotgan paytda qoidalarni buzgan holda u bilan aloqaga chiqqanini asosiy dalil sifatida koʻrsatishni rejalashtirmoqda.
