Agar «Man Siti» moliyaviy qoidabuzarlik uchun jazolansa, APL 2,8 milliard yevro yoʻqotishi mumkin
«Manchester Siti» klubi rahbariyati Angliya Premyer-ligasi tomonidan moliyaviy qoidalarning 115 bor buzilishi bo‘yicha chiqariladigan yakuniy hukmning kechikish sababini ma’lum qildi. Bu haqda The Touchline nashri xabar bermoqda.
Manba bergan ma’lumotga ko‘ra, hukmning kechikishi uning ortidan kelib chiqadigan jiddiy oqibatlar bilan bog‘liq. Agarda «shaharliklar» chempionatdan chetlatiladigan bo‘lsa, bu APLga 2,5 milliard funt sterlingga (2,8 mlrd yevro) tushishi mumkin.
Ta’kidlanishicha, «Manchester Siti» turnirni tark etgan taqdirda, jamoani nafaqat Xosep Gvardiola, balki Erling Holand kabi jahon darajasidagi yulduzlar ham ommaviy ravishda tark etishadi. Bu esa translyatsiya huquqiga ega bo‘lgan telekanallarga APL bilan shartnomalarni bekor qilish huquqini beradi. Natijada liga bir zumda bir necha milliardlik daromadidan mahrum bo‘lishi xavfi mavjud.
Eslatib o‘tamiz, Premyer-liga 2023 yilning fevral oyida «Manchester Siti»ga moliyaviy qoidalarni buzgani bo‘yicha rasmiy ayblov qo‘ygan edi. APL hujjatida jami 115 ta band ko‘rsatilgan.
