Agar Konseysau ketsa, «Yuvetnus» Grinvudni jamoaga olib kelmoqchi
Turinning «Yuventus» klubi «Marsel» qanot hujumchisi Meyson Grinvudni transfer qilish variantini ko‘rib chiqmoqda. La Gazzetta dello Sport nashrining xabar berishiga ko‘ra, 24 yoshli ingliz futbolchisi jamoani tark etishi mumkin bo‘lgan Fransishku Konseysauga munosib o‘rinbosar sifatida ko‘rilmoqda.
Ayni damda Konseysauga Angliyaning «Manchester Yunayted» va «Liverpul» klublari jiddiy qiziqish bildirmoqda. «Yuventus» rahbariyati Konseysau atrofidagi vaziyat qanday rivojlanishini va Edon Jegrova transferi bo‘yicha tushishi mumkin bo‘lgan takliflarni kutmoqda. Shu omillar asosida Grinvudni sotib olish bo‘yicha yakuniy qaror qabul qilinadi.
Meyson Grinvud joriy mavsumda barcha turnirlar doirasida 42 ta uchrashuvda maydonga tushib, o‘zining sermahsulligini namoyish etdi. U raqiblar darvozasiga 25 ta gol kiritish bilan birga, 10 ta samarali uzatmani ham amalga oshirdi.
Futbolchining «Marsel» bilan amaldagi shartnomasi 2029 yilning yoziga qadar mo‘ljallangan. Transfermarkt portali ma’lumotlariga ko‘ra, hujumchining bozor qiymati ayni paytda 55 million yevroga baholanmoqda.
