Shahram G'iyosov: “Bu jangni qizimga bag'ishlayman”

Boks 11 apr 2025 da 09:24

Nasrullo Karimov

12-aprel kuni AQSh'ning Nyu-Jersi shtati, Atlantik-Siti shahrida professional boks oqshomi tashkil etiladi.

Turnir doirasida yarim o'rta vazn toifasidagi charm qo'lqop ustamiz Shahram argentinalik Franko Maksimiliano Okampoga qarshi ringga ko'tariladi.

G'iyosov navbatdagi jangi oldidan vafot etgan qizini yodga olib, ushbu jangni unga bag'ishlashini aytdi.

“Albatta, bu men uchun juda qayg'uli. Men uni juda ham yaxshi ko'rardim. Uni haligacha sog'inaman. Lekin qizimga, ota-onamga Jahon chempioni bo'lishni va'da qilganman. Bu jangni qizimga bag'ishlayman”, - deydi G'iyosov.

Ma'lumot uchun, Shahram professional faoliyati davomida 16 ta jang o'tkazib, ularning barchasida g'alaba qozongan. Ularning 9 tasi muddatidan avval yakunlangan.