Rasuljonov — Urvanovga qarshi: Yekaterinburgda jiddiy sinov kutib turibdi
Ikkinchi yarim engil vazn toifasida mag'lubiyatsiz odimlayotgan o'zbekistonlik charm qo'lqop ustasi Xurshidbek Rasuljonovning navbatdagi jangi sanasi va raqibi ma'lum bo'ldi. 24 yoshli bokschimizning navbatdagi jangini joriy yilning 5 iyul kuni Rossiyaning Yekaterinburg shahrida tashkil etiladigan nufuzli RCC Boxing turnirida kuzatamiz. Unda Rasuljonov rossiyalik tajribali bokschi, 29 yoshli Mark Urvanovga qarshi ringga ko'tariladi.
Xurshidbek Rasuljonov hozirgacha 9 ta jang o'tkazgan va barchasida zafar quchgan. Mark Urvanov esa 30 jangda ishtirok etgan: 25 g'alaba, 3 mag'lubiyat va 2 durang qayd etgan.
Shuningdek, mazkur musobaqa doirasida yana bir vakilimiz — Ulug'bek Sobirov ham o'z jangida ishtirok etadi.
Jang kuniga bag'ishlangan afisha (poster) ham taqdim etildi.
